Project da chor “Rieischs”
Savognin – Coira – Berna
Mars 2023
„Rieischs“, uscheia igl nom digl proxim project ambiziuno digl Chor viril Surses cun preschentaziuns a Savognin, Coira e Berna igl mars 2023. Agl center stat l’ovra “Rieischs Surmiranas”, ena cumposiziun nova da radond 45 minutas per orchester, chor viril e bass-bariton sot la batgetta da Rainer Held.
Igls davos 4 decenis ò igl Chor viril Surses mano se an ena tscherta regularitad (mintga 7-8 onns) ovras pi grondas e pi pretensiousas. En tgit ainten l’istorgia giovna mossa igl sequent maletg:
1984 Cantata “Banadetg Fontana” da Duri Sialm
1992 Oratori “Taimp ed eternitad” da Xaver Schnyder von Wartensee
1999 Cantata “Gis festivs dalla Tgalavagna” dad Otto Barblan
2007 Cantatas “Igl mond digl paster pitschen” da Gion Antoni Derungs
e “Mosaic Sursetter” da Gion Giusep Derungs
2013 Requiem da Franz Liszt
Durant igl onn da cant 2017/18 òn la direcziun musicala e la suprastanza digl Chor viril Surses fatg partratgs davart ena proxima ovra pi gronda e pretensiousa. Ins è nia tar la conclusiun, da piglier an meira igl onn 2021 (perveia da Corona spusto sen igl 2022) e da luvrar cun orchester, essend tg’igl chor ò actualmaintg igl privilegi da neir dirigia dad en expert betg angal da chors, mabagn er da musica d’orchester.
L’intenziun digl Chor viril Surses cun igl program 2022 è dad interpretar musicalmaintg la derivanza, igl arcaic, la vista an igl preschaint ed igl futur da nossa patria “Surmeir”. Punct da partenza èn las rieischs tgi egn e mintgign sainta an sasez ed interpretescha individualmaintg. Uscheia er igl nom digl project “Rieischs” an igl vast senn digl pled.
Rieischs ins ogl – sch’ins vot ni betg ¦ On ne peut donner que deux choses à ses enfants: des racines et des ailes ¦ Der Mensch braucht Wurzeln ¦ Back to the roots ¦ Niemand darf seine Wurzeln vergessen ¦ Die Eindrücke der Kindheit wurzeln am tiefsten ¦ Sehnsucht nach den Wurzeln ¦ Entdecke die Wurzeln, die dich tragen ¦
L’ovra principala sa nomna „Rieischs Surmiranas“; ena cumposiziun da radond 40 minutas da Philip Henzi per orchester, chor viril e bass-bariton sen la basa da set canzungs popularas tradiziunalas rumantschas (T. Dolf, J.G. Scheel, G.D. Simeon, E. Lombriser, E. Broechin und C. Mani) e sen treis novas canzungs contemporanas a cappella per chor viril. Chellas treis cumposiziuns novas vignan tottas ord plemas da cumponists giovens ainten igls 30: Mario Pacchioli (*1981), Nina Mayer (*1982) e Flavio Bundi (*1987). Las treis ovras musicalas sa basan sen ena trilogia poetica cugl nom „Rieischs an muvimaint“ tgi cuntigna las treis poesias „Tign e retign“, „Igl novrivo“ scu er „An muvimaint“. Chest’ovra literara vign ord la plema da Dominique Dosch (*1995) da Tinizong. Avantor alla ovra principala von ovras digl nord dall’Europa da Tüür, Grieg e Sibelius tg’èn scu stgaffeidas per las vouschs virilas digl Chor viril Surses.
Uraufführung „Rieischs“Samstag, 11. März 2023, 20:00 UhrSavognin
Ausserkantonale Premiere „Rieischs“Sonntag, 19. März 202316:00 UhrBern
