Nous tschartgagn rinforzamaint

Innovaziun scontra tradiziun

Igl chor viril Surses organisescha igl mars 2023 a Savognin, Coira e Berna treis concerts tot spezials. I sa tracta d’en program per chor viril ed orchester sinfonic, tgi interpretescha danov la patria e las sias rieischs. Ovras digl Nord (Grieg, Sibelius, Tüür) precedan all’ovra principala ed innovativa «Rieischs Surmiranas». Chella cumposiziun da radond 40 minutas per chor viril, orchester e solo da bass sa basa sen set canzungs popularas tradiziunalas e treis cumposiziuns contemporanas da musicists giovens cun en text d’ena scribenta rumantscha da 25 onns. An maletgs sa scontran cun chell’ovra vigl e nov, gist scu chegl tgi en uigl vigl e venerabel cun tgesa d’abitar, davainta ena nova dimora abitabla per generaziuns futuras, graztga ad en’architectura moderna e funcziunala. Ulteriouras infurmaziun tar l’ovra RIEISCHS ’23.

Tschartgea cantadours (da project)

Siva la pandemia da corona dispona igl chor viril Surses da 50 commembers activs. En’ovra cun en orchester sinfonic
(45 musicists) pretenda aglmanc 60 cantadours, per tgi chor ed orchester tungan an armuneia equilibrada. Tschartgeas èn damai aglmanc 10 ulteriours cantadours, an spezial dallas vouschs tenor I, tenor II e bass I, tgi vottan collaborar eneda cun en chor modern ed attaschea allas tradiziuns. Chegl scu novs commembers activs u scu cantadours da project, sainza stueir surpiglier l’obligaziun d’ena commembranza.

20 provas plus represchentaziuns

Las provas on li per regla ainten la Sala da Grava a Savognin, mintgamai la dumengia-seira dallas 19:30 anfignen las 22:00. Vetiers vignan aglmanc ena prova digl de ena sonda, en avantmezde per la registraziun dallas treis cumposiziuns novas a capella (Concert CD) e las treis represchentaziuns a Savognin, Coira e Berna. A 16 da 20 provas vessan igls cantadours d’esser preschaints.

Interesso? Alloura per plascheir amplaneir or chest PDF e davent cun la posta!